БИШКЕК, 19-сен. — Sputnik. Өзгөчө номерлерге суроо-талап абдан чоң. Бул тууралуу Мамлекетик каттоо кызматынын маалымат кызматынан кабарлашты.
Бүгүндөн баштап транспорт каражаттары жана айдоочулук түзүмдү каттоо департаментинин ар бир бөлүмүндө өзгөчө унаа номерлери сатыла баштады. Баасы сандардын жана тамгалардын айкалышына жараша 2700 сомдон баштап 5000 миң сомго чейин жетет.
"Өзгөчө номерлер" (мисалы 111 AAA) 21-сентябрдан баштап аукцион аркылуу сатыкка чыгат.
"Ар бир номер үчүн орточо эсеп менен беш адам кезекте турат. Бишкекте түшкө чейин эле 100дөн ашык номер сатылып кетти. Эл саат 7ден баштап кезекте турат. Ким жетишсе, ошол сатып алды деген принцип иштеп жатат", — деп маалымат кызматынан кабарлашты.
Мамлекеттик каттоо кызматы 1-июндан баштап унааларга жаңы мамлекеттик номерлерди бере баштаган. Анда мурдагысынан айырмаланып, үч сан жана үч тамга жазылган. Номерлерде кыргыз желеги менен биргеликте Кыргызстандын эл аралык коду — KG түшүрүлгөн.
