БИШКЕК, 16-сен. — Sputnik. Үстүбүздөгү жылдын 21-сентябрында nomer.srs.kg сайтында унаанын өзгөчө номерлери онлайн-аукционго коюла тургандыгын Мамлекеттик каттоо кызматынан кабарлашты.
Билдирмеге караганда жалпысынан 37 даана өзгөчө номерди сатуу 21-22 жана 28-сентябрда үч этапта өткөрүлөт.
Өзгөчө номерлердин башталгыч баалары:
001 сандары менен башталып, бирдей комбинациядагы тамгалар менен уланган номерлер (001ААА) — 70 миң сомдон башталат;
001 сандары менен башталып, бирок тамгалар ар кандай комбинацияда болсо (001ААВ) — 63 миң сомдон башталат;
777 сандары бирдей комбинациядагы тамгалар менен болсо — 60 миң сом. Ал эми ар кандай комбинациядагы тамгалар менен уланса — 54 миң сомдон башталат.
002, 003, 004, 005, 006, 007, 008, 009, 100, 200, 300, 400, 500, 600, 700, 800, 900 саны менен башталган номерлер тамгалардын комбинациясына жараша — 27-30 миң сомдон башталат.
Ал эми эң минималдык баа 4,5-5 миң сомдон башталат. Бул каражатка — 010, 020, 030, 040, 050, 060, 070, 080, 090, 330 сандагы номерлерди алса болот.
21-сентябрда өтө турган биринчи аукционго бирдей комбинациядагы тамгалар менен 111, 222, 333, 444, 555 сандарындагы номерлер чыгарылат. Ушул эле сандар менен башталып ар кандай комбинациядагы тамгалар менен уланган номерлер дагы коюлат.
Экинчи онлайн-аукцион 22-сентябрда өтөт. Анда 666, 888 жана 999 сандагы номерлер ойнотулат.
Ал эми акыркы аукцион 28-сентябрда өткөрүлүп, 001 жана 007 номерлери ойнотулат.
Белгилей кетсек, аукционго катышууну каалагандар nomer.srs.kg сайтына катталып, баштапкы сумманын 10 пайызын ЭлСом аркылуу төлөөсү керектелет. Каражат которулгандан кийин кардарга SMS аркылуу билдирме жөнөтүлөт. Соодалашуу онлайн түрүндө гана жүрөт.
