БИШКЕК, 13-сен. — Sputnik. Кения полициясынын маалыматына караганда Момбаса шаарындагы полиция бөлүмүнө үч аял кол салып, аларга карата тартип сакчылары ок чыгарган. Бул туурасында Синьхуа агенттиги жазды.
Билдирүүгө ылайык, алардын бири бөлүмгө колго жасалган бомбаны ыргытып, экинчиси бычак менен полициянын эки кызматкерин жарадар кылган. Бул окуядан кийин полиция аялдарга карата ок чыгарган. Текшере келгенде алар ок өтпөс күрмө кийип алгандыгы аныкталган.
Бул чатактан кийин Кениянын коопсуздук кызматтары окуя болгон жерди курчоого алып, жарадар болгон эки полиция ооруканага жеткирилди.
Жергиликтүү полициянын жетекчиси Партерсон Маэло муну теракт деп атап, иликтөө иштери башталганын айтты
Азырынча эч бир уюм бул окуя боюнча жоопкерчиликти өзүнө ала элек. Анткен менен кол салуу Кенияда жардырууларды жасаганга аракеттенип келген сомалилик "Аш-Шабаб" тобунун колунан келиши мүмкүн деген ойлор айтылууда.
