Кыргызстан Минскини Бакиевге чыккан өкүмдү аткарууга чакырды

БИШКЕК, 8-сен. – Sputnik. Башкы прокурор Индира Жолдубаева Белоруссиянын бийлигин мурдагы министр Курманбек Бакиевдин өмүр бою эркинен ажыраткан өкүмдү таанып жана аны аткарууга чакырды. Бул туурасында Башкы прокуратуранын маалымат кызматы кабарлады.

Кыргызстандын аскер соту Курманбек Бакиев жана анын бир тууган иниси, мамлекеттик күзөт кызматын башкарып турган Жаныбек Бакиевди сыртынан өмүр бою абакка кескен өкүм чыгарган. 2010-жылдын 7-апрелинде бийликтин жүргүзгөн саясатына макул болбогон карапайым калк "Ала-Тоо" аянтына чыгып, ал кездеги президент Курманбек Бакиевди тактан кулаткан. Ошол күнү бийликтин огунан 80ден ашуун адам каза таап, Бакиев өлкөдөн чыгып кетүүгө аргасыз болгон. Кыргызстандын келечеги үчүн көз жумгандардын бир катарларынын сөөгү "Ата-Бейит" комплексине коюлган.

Мындан сырткары, Бакиев дагы эки адамдын өлүмүнө катыштыгы бар деп табылган. Экс-президент менен анын үй-бүлөсүнө, жакындарына эл аралык издөө салынган. 

Маалымат кызматы Башкы прокуратуранын жетекчиси Жолдубаева баштаган делегация Минскиде өтүп жаткан КМШнын башкы прокурорлорунун 26-отурумунун Координациялык кеңешине катышканын белгиледи. 

Отурум учурунда Кыргызстан менен Белоруссиянын башкы прокурорлорунун эки тараптуу жолугушуусу болду.

"Анда эки мамлекеттик укуктук жактан кызматташуусу боюнча сөз болду. Тагыраагы, учурда Белоруссияда жашап жаткан Курманбек Бакиевдин өмүр бою эркинен ажыраткан өкүмүн жана анын жакындары боюнча соттун чечимдерин таанып жана аны аткаруу туурасындагы маселе талкууланды", — деп айтылат маалыматта.

Көп адамдын канына забын болгон Бакиевдердин учурда Белоруссия аймагында жашап жатышы Минск менен Бишкектин ортосундагы талылуу суроолордун бири болуп келет.