Көчмөндөр ааламы дүйнөнүн көңүлүн бурду. Мынакей, көптөн күткөн Дүйнөлүк көчмөндөр оюндары башталып, ал дүйнө коомчулугунун көңүлүн бурду. Ачылыш аземи жогорку деңгээлде өттү. Түз эфирден түрт тилдүү мамлекеттер ага ортоктош болуп, ондон ашык канал Көчмөндөр оюндарынын ачылышын жеринен берип турду. Албетте мындай ири маданий иш-чаранын Кыргызстанда болуп жатышы көпчүлүктү шердентти, баарыбызга канат бүтүп тим эле көкүрөктү керип калдык. Чынында бул иш ошого татыктуу болду. Дүйнөлүк көчмөндөр оюндары Олимпиаданын альтернативасы болот дегендер да болбой койгон жок.
Кырчындагы кылкылдаган эл. Көчмөндөр оюндары Ысык-Көлдүн Кырчын жайлоосунда уланды. Бул жердин кооздугун эми айтып сөз менен жеткирүү кыйын. Мына ушундай ажайып жерде "Кыргыз айылы" этношаарчасы курулуп, айтыш, салбурун оюндары тартууланды. Анан албетте кыргыздын кыз куумай, жамбы атмай, тыйын эңмей аттуу улуттук оюндары келгендерди кайдыгер калтырган жок.
15 килограммдык нан. Көчмөндөр оюну ак төөнүн карды жарылган убакка дал келип, береке төгүлүп турган маал. Кырчындагы "Кыргыз айылы" этно шаарчасында Ош облусунан Базаргүл апа салмагы 15 килограмм болгон чоң патир нандарды жасап келген. Апанын бул эмгегине суктанып, аны жардана карагандардын аягы үзүлгөн жок. Кыргыздын пейилинен, меймандостугунан айланса болот. Береке төгүлүп, өлкөдө тынчтык гана болсун.
Саламат Садыкованын сагынганда жазган каты. Кыргыз эл артисти, III даражадагы "Манас" орденинин ээси жана жөн гана кыргыз элинин сүймөнчүк кызы Саламат Садыкова айылына кат жазды. Ырчы бул катта медер туткан, сыйынган жана аздектеген нерселери эмне экенин толук айткан. Эл кызы буга чейин катып келген сырларын айтып, ырчылыкка болгон узак сапары тууралуу саймедиреди.
Кытайга дүйнө лидерлери чогулду. Ушул күндөрү Кытайдын Ханчжоу шаарында G20 саммити башталды. Анда дүйнөнүн өнүккөн мамлекеттеринин лидерлери чогулду. Алар кызматташтыктын негизинде дүйнөлүк күчтүү экономиканы түзүү маселелерин талкуулашат.
Каримовдун мураскери ким болору кызуу талкууда. Өзбекстандын дээрлик отуз жылдан бери алмашпай келе жаткан президенти Ислам Каримов дүйнө салгандан кийин анын мураскери ким болот деген суроо дүйнө коомчулугун кызыктырып турган маалы. Себеби, Орто Азиядагы көп улуттуу мамлекеттердин бири болгон Өзбекстандын аймактагы орду чоң. Дүйнөлүк эң ири жалпыга маалымдоо каражаттары Каримовдун мураскери ким болот деп кызыгып, өз жоромолдорун жаадырышууда.
Валюта баасы. Бүгүн сомдун баасы долларга карата орто эсеп менен 69.11 (сатып алуу) жана 69.27 (сатуу) сомду түздү. Акыркы күндөрү анын наркы акырындап көтөрүлүп баратканын байкоого болот.
Мунай баасы. Бишкекте Аи-95 үлгүсүндөгү бензин 38. 30 сом, Аи-92 үлгүсүндөгү май 35.00 сом, ал эми дизель майы 30 сомдон сатылууда.
Соңку сөз ордуна. Ак төөнүн карды жарылган убак барыбызга кут болсун деп Расул Үсөналиев
