ОШ, 1-сен. — Sputnik. Түштүк борбор Ош шаарында Исанов менен Ленин көчөлөрүн бириктирген көпүрө пайдаланууга берилди. Анын салтанатына премьер-министр Сооронбай Жээнбеков, Ош шаарынын мэри Айтмамат Кадырбаев жана жергиликтүү бийлик өкүлдөрү катышты.
Аталган көпүрөнүн курулуш иштери ушул жылдын январь айында башталган.
Ак-Буура дарыясына курулган көпүрө Ош шаарында унаа кыймылын жөнгө салып жана унаа тыгындарынын жоюлуусуна шарт түзмөкчү.
Туурасы 14 метр жана эки тарабында жөө жүргүнчүлөр өтүүчү атайын жол бар.
Кадырбаев курулуш иштерине жалпысынан 73 миллион сом жумшалгандыгын билдирди.
Буга чейин Исанов көчөсүнөн Төлөйкөн айылына өтүү үчүн калаа тургундары 7 чакырым аралыкты айланып өтүүгө туура келчү. Эми шаардын бир четинен экинчисине каттоодо тургундарга 20 мүнөттү үнөмдөөгө шарт түзүлдү.
Көпүрө 100 тонна салмактагы жүктү көтөрүүгө ылайыкташтырылган жана күн сайын аталган жайдан 10 минден ашуун унаа каттамы жүрүп турат.
