БИШКЕК, 30-авг. — Sputnik. Өзбекстандын эгемендүүлүгүнүн 25 жылдыгына карата пландаштырылган өкмөттүк концерт болбой турган болду. Бул тууралуу дипломатиялык корпуска таянуу менен РИА Новости билдирди.
Концерт 31-августка белгиленип, буга чейин ага өлкө жетекчилиги, анын ичинде президент Ислам Каримов да катышчу.
"Концерт болбой тургандыгы тууралуу билдирүү түштү", — деп айтылат маалыматта.
Буга карабастан уюштуруу комитетинин өкүлү элдик майрамдоолор пландаштырылган тартипте өтө турганын белгиледи.
Буга чейин Өзбекстандын жалпыга маалымдоо каражаттары Каримов айрым бир убакытты талап кылган дарыланууда экенин жазып чыгышкан. Дүйшөмбү күнү кечинде президенттик аппарат Каримовдун абалы туруктуу экенин айтып, каза болгондугу тууралуу маалыматты четке каккан.
Быйыл Каримовдун буйругу менен Эгемендүүлүк майрамы үч күн белгиленмекчи.
