БИШКЕК, 10-авг. — Sputnik. Токтоболот Абдумомунов атындагы кыргыз улуттук драмалык театрында Юлия Дамскердин "На закате солнца" пьесасынын негизиндеги даректүү спектаклдин репетициясы башталды.
Окуяда негизинен 77 жаштагы эки актриса тууралуу баяндалат. Алар бир батирде жашайт. Аялдарды көп жылдык достуктан тышкары, кесиби да бириктирип турат.
Спектаклдин режиссеру Уланмырза Карыпбаев. Ал —Санкт-Петербургдагы Геннадий Тростянецкий атындагы театралдык академиясынын студенти.
Карыпбаев спектаклдеги көрүнүштөр чыныгы турмуштан алынганын айтат.
"Актрисалардын чыныгы окуясын чагылдырууда долбоордун катышуучулары алардын турмушун аябай иликтеп чыгышты. Аларды аткарган ролдорун эмес, бүгүнкү коом тууралуу айткыбыз келди", — дейт ал.
Спектаклде КР эл артисттери Гүлайым Каниметова, Турганбүбү Бообекова жана Дүйшөнбек Байдөбөтовдор роль жаратышат.
