БИШКЕК, 18-июл. — Sputnik. Баткен облусунда 4 баллга жеткен жер титирөө болду. Бул туурасында Өзгөчө кырдаалдар министрлиги Сейсмология институтуна шилтеме берүү менен билдирди.
Маалыматка ылайык, жер саат 13:17де силкинген. Анын эпицентри Баткен шаарынан 23 чакырым түштүк-чыгышта жана Боз-Адыр айылынан түштүк-батышты карай 3 чакырым алыстыкта жайгашкан.
Зилзала күчү Боз-Адыр айылында 4 балл, Бужум, Жаңы-Коргон, Ормош, Сур айылдарында жана Баткен шаарында 3 баллга жеткен. Алдын ала маалыматтар боюнча кыйроолор жок.
Бул бүгүнкү күндүн эсебинен болгон экинчи жер титирөө. Биринчиси Кыргызстан менен Кытайдын чек арасынын аймагында катталган.
