БИШКЕК, 2-июн. — Sputnik. КСДП фракциясынын депутаты Альфия Самигуллина бардык бейтапканаларда өспүрүм курактагы балдарга медициналык жардам берүүчү бөлмөлөрдү ачууну сунуш кылды. Бул тууралуу аталган фракциянын катчылыгы билдирди.
Депутаттын айтымында, Кыргызстанда балдарды коргоо жаатындагы улуттук мыйзамдык база болгону менен бюджеттин тартыштыгынан улам бир катар нормалар иштебей келет.
Самигуллина кырдаал ички жана сырткы миграциянын күчөөсү менен курчуп жатканын белгиледи.
"Балдар чоң ата, чоң энелеринин кароосунда калып, ата-эненин тарбиясы жок чоңоюшууда. Өспүрүмдөрдүн саламаттыгын караган атайын дарыгерлер жок, болсо да өтө аз. Кыргызстандын саламаттык сактоо системасында өспүрүмдөр терапевти, гинеколог жана андронологдор жетишпейт. Ал эми жалпы практикадагы дарыгерлердин өспүрүмдөрдү дарылоо боюнча тажрыйбасы аз", — деди эл өкүл.
Ал өспүрүмдөр арасында көп кездешкен суицид маселесин козгоду. Депутаттын пикиринде мындай бөлмөлөрдүн ачылышы балдарга психологиялык да жактан жардам берип, бул өз кезегинде алардын өзүнө кол салуусун азайтмак.
Самигуллина КРдин саламаттык сактоо системасына өспүрүмдөр дарыгерлерин окутуу жана даярдоо боюнча программаны киргизүү зарыл экенин белгиледи.
