БИШКЕК, 30-май — Sputnik. Кыргызстан мусулмандарынын азирети муфтийи Максатбек ажы Токтомушев жана азирети муфтийдин орун басары Жоробай ажы Шергазыев Түркиянын Стамбул шаарында өтүп жаткан бирдиктүү хижрий календарынын астрономиялык эсептөөлөрү боюнча эл аралык конгресске катышууда. Бул тууралуу муфтияттын маалымат кызматы билдирди.
Конгресс алкагында Рамазан айынын башталышына карата диний майрамдардын так убактысын белгилөө, календарлык биримдикти уюштуруу маселеси талкууланууда.
Эскерте кетсек, быйыл орозо болжол менен 6-июнда башталат.
Ал эми Рамазан айынын 27-түнү, башкача айтканда 2-июлда Кадыр түн болот. Орозо айт майрамы 6-июлга дал келет. Мусулмандардын маанилүү делген майрамы Курман айт 12-сентябрда белгиленмекчи.
Бул даталар болжолдуу алынган. Такталган билдирүү айдын чыгышына карап, июндун башында белгилүү болот. Муфтият бул даталар 1-2 күнгө жылышы мүмкүн экенин божомолдойт.
