БИШКЕК, 25-май — Sputnik. Россиянын Смоленск шаарында полиция кызматкерлери 10 жылдан бери эл аралык издөөдө жүргөн жаран кармалганы РФтин Ички иштер министрлигинин сайтында жайгаштырылган.
Маалыматка ылайык, аталган жаран Кыргызстандын укук коргоо органдарынын демилгеси менен колго түшүрүлгөн.
Смоленск шаарынын полициясына Россияда иштөөгө уруксат алуу үчүн документ тапшырган чет элдик жарандын бирөө эл аралык издөөдө экендиги тууралуу маалымат түшкөн. Текшере келгенде ал Кыргызстандын жараны болуп чыккан. 35 жаштагы кармалган жаран Кыргызстандын кылмыш жаза кодексинин 336-беренеси (Жаза өтөп жаткан жеринен качуу) боюнча изделип жаткан.
Учурда кыргыз тарапка качкындын кармалышы тууралуу маалымат берилип, аны экстрадициялоо боюнча документтер даярдалып жатат.
