БИШКЕК, 23-май — Sputnik. Баткен облусуна караштуу Кызыл-Кыя шаарындагы "Айбек" базарында жайгашкан акча алмаштыруучу жайдын ээси Эркин Разаков чет элдик жарандарга кантип алданганын Sputnik Кыргызстан агенттигине айтып берди.
Анын айтымында, чет элдик жарандар 27 жаштагы баласын 32 миң долларын алдап алып, сызга отургузуп кетишкен.
"Эки чет элдик жаран биздин акча алмаштыруучу жайга келип, сомду долларга алмаштырмак болушат. Алар куулукка салып баламдан биринчи 32 миң долларды алып санамыш болушат дагы, өздөрү алдын ала 400 доллардын ичине бир долларлыктарды толтуруп даярдап келген акчага алмаштырып коюшат", — деди Разаков.
Анын айтымында, алдамчылар долларды "алмаштырган" соң сумкага салып "акча бул жерде туруп турсун, биз азыр 10 мүнөттөн кийин сом алып келебиз" деп кетип калышкан.
Анын айтымында, окуя 13-майда болгон. Бирок ушул күнгө чейин кылмышкерлердин өздүгү тууралуу бир дагы маалымат тактала элек.
Ал эми окуяны тергөөгө алган Кызыл-Кыя шаардык ички иштер бөлүмүнүн кызматкери Абдисалам Нурматов ыкчам-изилдөө иштери жүрүп жатканын билдирди.
"Аталган факты боюнча Кылмыш жаза кодексинин 166-беренесинин 3-бөлүгүнүн негизинде кылмыш иши козголду. Алар кайсы улуттун өкүлдөрү экени белгисиз болууда", — дейт Нурматов.
Анын айтымында, мындай алдамчылар Таласта дагы байкалган.
Тергөөчү учурда алдамчылар тууралуу бардык чек ара өткөрмө пункттарына маалымат берилип, кирип-чыккан чет элдик жарандардын тизмеси иликтөөгө алынганын айтты.
Мындан тышкары, тергөөчү алдамчылар атайын жаш бала отурган акча алмаштыруучу жайга киришкенин белгиледи.
"Тергөө учурунда башка акча алмаштыруучу жайдын ээлери аларга эч кандай чет элдик жарандар кирбегенин айтышты", — деди тергөөчү.
Нурматов жаш баланын ишенимине кирүү үчүн шылуундар буга чейин бир нече ирет ага келип аз суммадагы долларды алмаштырып кетип турушканын кошумчалады.
