БИШКЕК, 18-май — Sputnik. Премьер-министр Сооронбай Жээнбеков Ош шаарынын мэрлигине талапкер көрсөтпөө боюнча чечим кабыл алганын өкмөттүн маалымат кызматы билдирди.
Учурда бул кызматка КСДП фракциясы Оштун учурдагы жетекчиси Айтмамат Кадырбаевдин талапкерлигин көрсөтсө, "Өнүгүү-Прогресс" фракциясы Алишер Мойдуновдун талапкерлигин алып чыккан. Экөө 17-май күнү мамлекеттик тил боюнча экзаменди ийгиликтүү тапшырышты.
Премьер-министр демократиялык принциптердин өнүгүшү, жергиликтүү бийликтин ишмердүүлүгүн бекемдөө, шайлоонун ачык-айкындуулугун камсыздоо максатында өз укугун пайдалануудан баш тартып жатканын белгиледи.
"Ош шаардык кеңешинин депутаттары шайлоочулардын каалоосун эске алып, тажрыйбалуу, кесипкөй талапкерди тандап аларына көзүм жетет", — деди өкмөт башчы.
Муну менен бирге Жээнбеков алдыда боло турган шайлоо жогорку деңгээлде, бардык мыйзам ченемдеринин сакталышы менен өтөрүнө ишеним артты.
