БИШКЕК, 18-май — Sputnik. Бүгүн,18-майда эл аралык музей күнүнө карата Бишкектеги Михаил Фрунзенин мемориалдык музейинде "Музейдеги түн" акциясы өтөт. Бул тууралуу туризм департаменти билдирди.
Иш-чаранын максаты жарандар арасында музейлердин популярдуулугун арттырып, ага келүүчүлөрдүн санын көбөйтүү болуп саналат.
"Музейдеги түн" акциясынын алкагында атактуу ырчылардан концерттик программа тартууланып, белектер тапшырылат. Мындан сырткары, Фрунзенин эмгектери эскерилет.
Акция саат 15:30да башталып, 22:00го чейин уланат.
Буга чейин аталган акция 14-май күнү Гапар Айтиев атындагы мамлекеттик көркөм өнөр сүрөт музейинде өтүп, ага 2000ге чукул адам келген.
Эл аралык музей майрамы 1978-жылдан бери 18-май күнү белгиленип келет. Бул күнү дүйнө жүзүндөгү музейлер каалоочулар үчүн эшигин акысыз ачып, концерттик программалар тартууланат.
