БИШКЕК, 18-май — Sputnik. Интеллектуалдык менчик жана инновациялар мамлекеттик кызматы (Кыргызпатент) "Интеллектуалдык жана инновациялык ресурстар – 2016" республикалык көргөзмөсүн өткөрөт. Бул туурасында аталган ведомствонун маалымат кызматынан кабарлашты.
"Бул иш-чара менен жарандардын көңүлүн өлкөнүн инновациялык мүмкүнчүлүктөрүнө буруу, өсүп келаткан муундун ойлоп табуучулукка кызыгуусун арттырууга басым жасайт",— деп билдирди Кыргызпатент.
Көргөзмө ойлоп табуучулук, өнөр жай, айыл чарба, балдар жана өспүрүмдөр чыгармачылыгы, кол өнөрчүлүк тематикалык бөлүмдөр боюнча өткөрүлөт.
Көргөзмөнүн ишине ойлоп табуучулар, министрликтер жана ведомстволордун, бизнес жамааттардын, ЖОЖ, илимий изилдөө институт жана борборлордун өкүлдөрү катышат.
Көргөзмө 19-20-майда Бишкек шаарында Токтоболот Абдымомунов атындагы Кыргыз Улуттук академиялык драма театрында өткөрүлөт.
