БИШКЕК, 17-май — Sputnik. Нарында болгон катуу шамал үйлөрдүн чатырларын учуруп кеткенин ӨКМдин маалымат кызматы билдирди.
Ылдамдыгы секундасына 17-18 метрге жеткен шамал Нарын шаарында 16-май күнү саат 15.40 чамасында катталган. Натыйжада эки үйдүн чатыры учуп кеткен.
Шамалдан улам жалпы 190 метр квадрат аянттагы чатырлар жараксыз болуп калган.
Ал эми Ат-Башы районунда шамалдын ылдамдыгы секундасына 25-27 метрди түзгөн. Анын кесепетинен 19 жер үйдүн 500 шифери, бир мектептин жана беш социалдык объектинин чатырлары жараксыз болуп калган.
Учурда Өзгөчө кырдаалдар министрлигинин жарандык коргонуу комиссиясы чыгымдардын көлөмүн эсептеп жатат.
