ЧОЛПОН-АТА, 14-май — Sputnik. Жыл сайын өткөрүлүүчү эл аралык Run The Silk Road марафондун жеңүүчүлөрү аныкталды.
Чуркоого 1800 марафончу катышты. Кыргызстанда өткөн иш-чарага Япония, Казакстан, Англия жана башка өлкөлөрдүн спортчулары келишкен. Марафонду өткөрүү үчүн 20 чакырым аралыктагы Чолпон-Ата — Корумду трассасы жабылган. Спортчулар А пунктунан В пунктуна чейин чуркап кайра артка кайтышты.
Марафондун жеңүүчүсү болуп кыргызстандык Аман Момуналиев таанылды (42 чакырым 195 метр аралыкка чуркаган). Ал былтыр өткөн таймашта дагы биринчи болуп марага жеткен. Ал эми аялдар арасында мыкты көрсөткүчтү Маргарита Трифонова көрсөттү. Ал былтыр мыкты спортчулардын алдыңкы үч сабына кирген.
Марафондун мыкты катышуучулары катары Адилет Кыштакбеков менен Алина Меремьянина таанылды (21 чакырым 97,5 метр). Жеңүүчүлөрдүн бардыгы кыргызстандыктар болуп чыкты.
Биринчи орун үчүн марафончулар миң доллар акчалай сыйлыкка ээ болушту.
Эл аралык "Run The Silk Road" марафону быйыл бешинчи ирет өтүүдө. Иш-чара олимпиада оюндарында байгелүү орунга ээ болгон кыргызстандык жөө күлүк Сатымкул Жуманазаровдун жаркын элесине арналат.
