БИШКЕК, 9-май — Sputnik. Эмгек жана социалдык өнүгүү министри Кудайберген Базарбаев согуш жылдары дайынсыз жоголуп кеткендерди издеп табуу менен алектенип келген кыргызстандык Каныбек Мырзакановго "Көгүлтүр Ысык-Көл" санаторийине жолдомо берди. Бул тууралуу аталган мекеме билдирди.
Министр Мырзаканов — эрктүүлүк менен кайраттуулуктун белгиси экенин белгилеп өттү.
"Көзү азиз болсо да аталардын жаткан жайын табууга жардамдашып келет. Анын мындай аракетинен улам жүздөгөн адамдар 70 жылдан бери үмүт артып күтүп келген жакындарын табышты. Каныбек Мырзакановдун жубайы Гүлнур менен жасаган иши — чыныгы жарандык эрдик болуп саналат", — деди Кудайбергенов.
"Өспүрүм курагымда футбол боюнча СССРдин "Кожаный мяч" чемпионатына катышкам. Биринчиликти алып, Украинанын Николаев шаарына бардык. Ал жактан бизди согуш өткөн жерлерге алып барышты. 14 жашта болчумун. Курман болгон жоокерлер көмүлгөн жерге жасалган мамиле мени аябай таң калтырды. Келгенден кийин апама таятамдын жаткан жайын табам деп сөз бердим. Кай жакка гана жазган жокмун, жети жылдан кийин "Мемориал" деген сайтты таап, чогуу иш алып бардык. Бир нече айдан кийин таятам 1943-жылы Смоленскиде курман болгону аныкталды", — деди Мырзаканов.
Анын айтымында, апасы мүрзөгө барып, Кыргызстандан ала барган топурагын чачып, мусулман ырым-жырымын жасаган.
