БИШКЕК, 4-май — Sputnik. Казакстандын Айыл чарба министрлиги Кыргызстандан картошка алууну убактылуу токтотконун Новости-Казакстан агенттиги билдирди.
Мекеменин маалымат кызматынын айтымында, өлкө аймагына Кыргызстандан акыркы убакта нематод менен ууланган картошка киргизилип жатканы байкалган.
Министрликтин маалыматы боюнча үстүбүздөгү жылдын январь айынан баштап ууланган картошка кргизилген 79 учур катталган. Мындан улам Кыргызстанга жараксыз делген продукциянын 1000ден ашуун тоннасы кайтарылган. Андан сырткары, ууланган картошка айдоо иштери үчүн пайдаланылышы мүмкүн деген кооптуулук күчөгөн.
"Карантинге алынган продукциянын киргизилишинен анын массалык түрдө жайылышы мүмкүн экенин эске алып казак өкмөтү Кыргызстан бийлигине тийиштүү чараларды кабыл алуу боюнча кайрылуу жолдогон. Бирок ушул мезгилге чейин кыргыз тараптан чаралардын көрүлүшү тууралуу эч кандай маалымат келген жок", —деп айтылат билдирүүдө.
Министрликтин маалыматы боюнча Казакстанга Кыргызстандан ууланган картошка киргизүү фактылары азыр деле уланууда.
