БИШКЕК, 20-апр. — Sputnik. Аялды сүзүп, 50 метрдей жерге чейин сүйрөп барган айдоочу кармалды. 40-50 жаштар чамасындагы аял алган жаракатынан улам каза болгон. Бул тууралуу Чүй ИИББдин маалымат кызматы билдирди.
Ага ылайык, окуя 19-апрелде саат 21.45тер чамасында болгон. Аялды "Мерседес-Бенц" үлгүсүндөгү машина менен коюп кеткен айдоочу токтобой, окуя болгон жерден изин жашырып кеткен.
Патрулдук милиция шектүү машинаны кырсык болгон жерден бир нече чакырым алыс аймакта токтоп турган жеринен тапкан.
"Учурда айдоочу кармалып, Токмок шаардык милициясына алынып келди. Ал Нарын облусунун тургуну болгон. Кырсык болгон учурда анын мас абалында болуп-болбогону сот-медициналык экспертизанын жыйынтыгында аныкталат", — деп ИИББден билдиришти.
Каза болгон аялдын туугандары табылып, учурда аялдын ким экенин аныктоо иштери жүрүп жатат. Жакындары анын документтерин алып келүү үчүн кеткенин милициядан кошумчалашты.
