БИШКЕК, 15-апр. — Sputnik. Кечээ Бишкекте балдар жабыркаган эки жол кырсыгы катталганын Кайгуул милициясы билдирди.
Маалыматка ылайык, саат 11.15те Шопоков менен Токтогул көчөлөрүнүн кесилишинде Toyota 4Runner унаасы менен бараткан 27 жаштагы айым айдоочу сегиз жашар баланы коюп кеткен. Натыйжада баланын баш мээси чайкалып, Улуттук госпиталга жеткирилди.
Ушул эле күнү Daimler Chrysler унаасынын айдоочусу Бөкөнбаев көчөсү менен Манас проспектисинин кесилишинде жолдон өтүп бараткан 11 жаштагы окуучуну коюп кеткен. Натыйжада баланын оң буту жабыркап, ооруканага жаткырылды.
Окуя болгон жерлерге келген Кайгуул милициясынын кызматкерлери иликтөө иштерин жүргүзүп, унааларды айып короого токтотушту.
