БИШКЕК, 30-мар. — Sputnik, Асел Минбаева. Кыргызстандын Улуттук банкы 28-март күнү эсептик коюмду 10 пайыздан 8ге чейин төмөндөтүү чечимин кабыл алды. Бул коммерциялык банктарга башкы финансылык мекемеден 8 пайыздык үстөк карыз алуусуна жол ачат.
Улуттук банктын маалыматы боюнча март айында экономикалык активдүүлүктүн төмөндөө маалында Кыргызстандагы товарлар менен тейлөө кызматы арзандап келген. Коюмду төмөндөтүү менен банк экономиканын реалдуу секторун стимулдаштырууга ниет кылат. Мындай кадам канчалык деңгээлде өзүн актай турганына экономика боюнча үч эксперт баш катырып көрдү.
Андрей Красин, коммерциялык банктын башкармачылыгынын төрагасы:
Эсептик коюмдун төмөндөшү насыяга эч кандай таасирин тийгизбейт. Кыргызстанда анын баасы көбүнесе валюта курсунан көз каранды.
Учурда Улуттук банк доллар менен берилүүчү насыяга чек койду. Бул эсептик коюм боюнча кабыл алынган чечимге караганда насыянын баасына көбүрөөк таасир этет.
Эсептик коюм — бул номиналдык чара.
Кубат Рахимов, көз карандысыз эксперт:
Улуттук банктан карыз алган коммерциялык банктар үчүн анын баасы арзандайт. Бирок насыя баасынын төмөндөшүнө башка нерселер да таасир этет: банктардын насыялык базасы кардарлардын акча салуусунан түзүлөт. Башкача айтканда, банк көбүнесе бир кардардан алган акчасын башкасына насыяга берип иштейт.
Бирок мындай чара биздин суроо-талаптарыбызга жооп бербейт. Россия менен Казакстандын базарларында туруктуу орун ээлегендин ордуна биз тескерисинче мурун кытайлар ээлеп келген өз базарыбызга алардын соодагерлери менен толтуруп жатабыз.
Инфляция экономиканын өнүгүүсүн дайым коштоп жүрөт, буга баш ийиш керек.
Залкар Камалов, экономика илимдеринин кандидаты:
Эсептик коюм буга чейин деле төмөндөп келген, бирок бул насыя саясатына көп таасир этчү эмес. Бирок азыр элдин колунда акча жок.
Банктар коюмдун көлөмүн төмөндөтүүгө өздөрү кызыкдар болушу мүмкүн. Алар берилген насыянын саны боюнча утушка ээ болушу мүмкүн.
