БИШКЕК, 25-мар. — Sputnik. Кытайдын Үрүмчү шаарында "Кыргыз балы" аталышындагы соода үйү ачылды. Бул тууралуу Sputnik Кыргызстан агенттигине Айыл чарба министрлигинин маалымат кызматынын өкүлү Төлөгөн Сулайманов билдирди.
"Соода үйүнүн ачылышына 24-март күнү Айыл чарба министри Турдуназир Бекбоев баштаган делегация барып катышты", — деп билдирди Сулайманов.
Анын айтымында, соода борборунда Кыргызстандын балы менен айыл чарба продукциялары сатыкка коюла баштайт.
Соода үйүнүн ачылышы өкмөттөр аралык келишимдин негизинде ишке ашып жатканын маалымат катчы кошумчалады.
