БИШКЕК, 18-мар. — Sputnik. Он жаштагы кызга ыплас иштерди жасады деп шектелген мугалим буга чейин соттолбогонун Бишкек мэриясынын билим берүү башкармалыгынын жетекчиси Сауле Мейрманова Sputnik Кыргызстан маалымат агенттигине билдирди.
Белгилей кетсек, шаардык милиция радио-техника ийримине барган он жаштагы кызды класска камап алып ыплас аракеттерге барган деген шек менен 44 жаштагы мугалим кармалганын билдирген.
Мейрманованын айтымында, милиция тарабынан шектелип кармалган жаран боюнча бардык документтерди мектеп директору көрсөткөн.
"Шектелген мугалим буга чейин соттолуп, жоопкерчиликке тартылган эмес. Ошондой эле анын психикалык саламаттыгы жайында экенин тактай турчу документи да болгон", — деди ал.
Мейрманова он жаштагы кызга карата мугалим тараптан ыплас аракеттердин болгону тууралуу окуучунун апасы мэриянын алдындагы Балдарды коргоо борборуна кайрылгандан кийин билишкенин кошумчалады. Шектүү жаран Ленин райондук ИИБ кызматкерлери тарабынан кармалып, убактылуу кармоочу жайга киргизилди.
