БИШКЕК, 19-мар. — Sputnik. Коомдук телерадиокорпорациясынын кызматкерлери кыргыз тилинин эрежелерин үйрөнүү боюнча семинар-тренингден өтүп жатышканын Мамлекеттик тил боюнча улуттук комиссия билдирди.
Маалыматка ылайык, иш-чараны комиссиянын алдындагы Окуу-маалымат борбору өткөрүүдө. Окутуу иштери боюнча маселе комиссиянын төрагасы Эгемберди Эрматов тарабынан сунушталган.
"Эки тараптуу макулдашуудан соң окууну каалаган кызматкерлерден эки топ түзүлүп, биринчи топ үчүн алгачкы окуу иштери 18-мартта башталды", — деп айтылат билдирүүдө.
Эки күндүк семинар-тренингдин жүрүшүндө катышуучулар кыргыз тилинин орфографиялык жана орфоэпиялык эрежелери, иш кагаздарын мамлекеттик тилде жүргүзүү, термин маселелери боюнча маалымат алышууда.
