БИШКЕК, 18-мар. — Sputnik. Коопсуздук сактоо максатында Кыргызстандын жарандарына Сох аймагына убактылуу кирбей туруу боюнча түшүндүрүү иштери жүрүп жатканын Мамлекеттик чек ара кызматынын төрагасынын орун басары Абдикарим Алимбаев Sputnik Кыргызстан маалымат агенттигине билдирди.
Буга чейин Жалал-Абад облусунун Ала-Бука районундагы чек арага өзбек чек арачылары БТР менен аскерлерин жайгаштырып жатат деп Мамлекеттик чек ара кызматынан билдиришкен эле. Андан сырткары "Маданият" көзөмөл өткөрүү пункту жабылган.
Алимбаевдин айтымында Сохтун айланасында жайгашкан Таян, Сай, Бөжөй айылдарынан анклавды көздөй жолдору коопсуздук үчүн жабылды.
"Азыр тургундарга коопсуздук үчүн соода-сатык жана күнүмдүк жумуштар менен Сох аймагына кирбей туруу боюнча түшүндүрүү иштери жүрүп жатат", — деди ал.
Мамлекеттик чек ара кызматынын төрагасынын орун басары "Маданият" чек ара көзөмөл өткөрүү пунктун өзбек тарап эмне себептен жапканы белгисиз экенин айтып, сүйлөшүүлөр жүрүп жатканын кошумчалады.
