БИШКЕК, 17-мар. — Sputnik. Финансы полициясы кыргызстандык жарандын Баткенде жайгашкан банктын кызматкерлери менен жең ичинен сүйлөшүп, кылмыш жолу менен табылган ири суммадагы акчаны адалдаштыруу үчүн Россияга которуп жибергенин аныктады.
Маалыматка ылайык, 2013-2014-жылдардын аралыгында аталган жаран Кызыл-Кыя шаарындагы "ФинансКредитБанктын" кызматкерлери менен тымызын келишимге барган. Банк жумушчулары документтерди жасалмалоо менен Россияга жалпы жонунан 6 миллион 790 миң сом которуп беришкен.
Бул боюнча Кылмыш жаза кодексинин "Кылмыштуу кирешени адалдоо" жана "Документтерди жасалмалоо" беренелеринин негизинде кылмыш иши козголду. Учурда тергөө амалдары жүрүп жатат.
