БИШКЕК, 17-мар. — Sputnik. Бишкек шаарынын таштанды төгүү жайынан жаңы төрөлгөн кыздын сөөгү табылганын шаардык милициянын маалымат кызматы билдирди.
Ага ылайык, 16-мартта саат 11.00дөр чамасында шаардык милицияга ымыркайдын сөөгү табылганы боюнча билдирүү түшкөн. Аны таштанды төгүү жайынан желим бөтөлкө издеп жүргөн киши таап алган.
"16-март күнү болжол менен саат 10:00 чамасында таштандыны аралап жүргөн киши ак мүшөктү көрүп, ичинен желим бөтөлкө таап алуу максатында ачып карап, жансыз ымыркайды көргөн. Аны жерде жаткан халатка ороп таштанды төгүүчү жайдан чыккан. Жолдун боюндагы үйдүн астына алып келип, өзүнүн уюлдук телефону жоктугуна байланыштуу ошол жерде иштеп жүргөндөрдөн милицияга чалууну суранган", — деп айтылат билдирүүдө.
Ымыркайдын сөөгү Бишкек шаардык өлүк сактоо жайына жеткирилип, соттук медициналык экспертиза дайындалды. Анын кыз экени аныкталган.
Учурда окуянын чоо-жайын тактоо иштери жүрүүдө.
Белгилей кетсек, 10-мартта Бишкек шаарындагы Алма-Ата жана Аалы Токомбаев көчөлөрүнүн кесилишиндеги арыктан "Тазалык" ишканасынын жумушчулары таңкы саат жетилер чамасында ымыркайдын баштыкка салынган денесин таап, милицияга кабарлашкан.
