БИШКЕК, 10-мар. — Sputnik. Парламенттин отурумунда эл өкүлү Садык Шер-Нияз күрөш боюнча азия биринчилигинде ийгиликке жеткендерге өкмөт тараптан татыктуу көңүл бурууну сунуштады.
"Баарыбызга белгилүү болгондой эле, күрөш боюнча азия биринчилигинде кыргызстандык спортчулар ийгилик жаратышты. Мага жеткен маалыматтар боюнча жалпы жыйынтыкта биздин өлкө Кытайдан кийинки эле орунду ээлеген. Бул чоң жетишкендик", — деди депутат.
Ал кошумчалагандай өкмөт спортчуларга татыктуу көңүл буруусу керек.
Эске сала кетсек, күрөш боюнча азия биринчилиги 17-21-февраль күндөрү Бангкоктун Таиланд шаарында болуп өткөн. Анда Кыргызстандык спортчулар үч алтын, эки күмүш жана үч коло медаль утуп, жалпы эсепте үчүнчү орунду ээлеген. Ал эми жалпы эсептин сап башында Иран андан соң Кытай турат.
