БИШКЕК, 5-мар. — Sputnik. Теңир-тоолук айымдар табигаттын катаал шартында эмгектенип, ийгилик жаратып келет. Бул тууралуу премьер-министр Нарын облусуна болгон иш сапарынын алкагында облустун аялдар активин 8-март майрамы менен куттуктоо учурунда айтты.
Жолугушууга Нарын облусунун бардык райондорундагы эмгеги менен өзгөчөлөнгөн айымдар катышты. Сариев өлкөнү өнүктүрүүдө аялдардын орду өзгөчө экенин белгилеп, Нарындын катаал шартына карабастан, балдарга татыктуу билим берген агартуу кызматкерлеринин, элдин саламаттыгына кам көргөн дарыгерлердин да көпчүлүгү айымдар экенин белгиледи.
"Үй түйшүгүнө карабай, мамлекеттик кызматта болобу, өндүрүштүн ар тармагында болобу, же болбосо илим, билим, маданият жаатында жоопкерчилик менен эмгек өтөп, жогорку көрсөткүчтөргө жетишип келесиздер. Өкмөт өлкөнү өнүктүрүү, жарандардарга кам көрүү боюнча бардык аракетти көрүп жатат", — деди Сариев.
Премьер-министр бийик тоолуу аймактарга шарттарды жеңилдетүү, жол салып, мектеп куруу боюнча иштер күчөтүлгөнүн маалымдады.
Муну менен бирге Сариев жолугушууда өлкөдөгү жана аймактагы орчундуу маселелер жана аткарылып жатка иштер тууралуу маалымат берип, айымдар менен баарлашты.
