БИШКЕК, 5-фев. — Sputnik. Кыргызстандын аймагына чет жактан алып келинген товарлардын баасынын өзгөрүшүн Улуттук статистикалык комитет иликтеп көрдү.
Мекеменин маалыматы боюнча, импорттук товарлардын ичинен цемент өзүнүн кымбаттап кеткен баасы менен сап башында турат. Жыл ичинде анын наркы дээрлик төрт эсеге жогорулап кеткен. Учурда аталган курулуш материалынын бир тоннасы 36 миң сомдон сатылууда.
Мындан тышкары, чет жактан келген жашылчалар да 3,5 эсеге кымбаттаган. Статкомитеттин маалыматы боюнча чет өлкөдөн алып келинген жашылчалардын бир килограммы орточо 49 сомду түзөт.
Ал эми чет элдик унаалардын баасы, тескерисинде, кыйла төмөндөп кеткен — бир жыл ичинде үч эсеге арзандаган жеңил унаалардын жаңысын ушу тапта 14 миң долларга сатып алууга болот.
Чет элдик тамекилер 84 пайызга арзандады, муну менен бирге мөмө-жемиштердин баасы 40 пайызга төмөндөдү.
Шире, шоколад, тиричилик химиясы жана эмеректин да наркы 30 пайызга арзандаганын байкоого болот.
