БИШКЕК, 27-янв. – Sputnik. Кыргызстандын айрым аймактарында катуу жаан-чачын күтүлүүдө. Зымдарга жана дарактарга суу кар жармашат. Бул тууралуу Өзгөчө кырдаалдар министрлигинин маалымат кызматы билдирди.
Үстүбүздөгү жылдын 27-январынан тартып 30-январга чейин мезгил-мезгили менен кар жаайт. Ал эми Чүй, Талас, Ош жана Жалал-Абад облустарынын кээ бир аймактарында жаан-чачын катуу жаашы күтүлөөрү маалыматта айтылат.
Ал эми 29-30-январда абанын температурасы аймактарда кыйла төмөндөйт.
Ош, Жалал-Абад, Чүй облустарынын өрөндөөрүндө жана Баткен облусунун дыйканчылык аймактарында түнкүсүн 7…12°, күндүз 0…5° суук болот.
Талас өрөөнүндө жана тоо этектеринде түнкүсүн 10…15°, күндүз 1…6° суукка чейин, Ысык-Көл ойдуңунда түнкүсүн 7…12°, күндүз 2…7° суукка чейин, Нарын облусунун дыйканчылык аймактарында жана тоолуу райондордо түнкүсүн 20…25°, күндүз 10…15° суукка чейин жетет.
Мындай аба ырайы унаа жолдордун абалын начарлатат, автоунаа, энергетика жана коммуналдык кызматтардын ишин жана жайыттарда малды кармоону кыйындатат.