БИШКЕК, 27-янв. — Sputnik. Үстүбүздөгү жылдын 1-февралына чейин салык карызын жойгондор үчүн төлөмдүн пайызы, тууму жана салык санкциялары 80 пайызга кыскара турганын Мамлекеттик салык кызматы билдирди.
Маалыматка ылайык, мындай мыйзам былтыркы жылдын 4-августунда күчүнө кирип, ушул жылдын 1-майына чейин иштейт.
1-февралга чейин салык карызынын негизги суммасын (2015-жылдын 1-августуна карата) жана учурдагы төлөмдөрүн төлөгөн салык төлөөчүлөрдүн пайыздары, тууму жана салык санкциялары 80 пайызга, 1-майына чейин төлөгөндөрдүкү — 50 пайызга эсептен чыгарылат.
"Пайыздарды, туумдарды жана салык санкцияларын эсептен чыгаруу үчүн жарандар катталган жери боюнча салык органына кайрылуусу абзел", — деп айтылат билдирүүдө.
Салык санкцияларын эсептен чыгаруу боюнча кампания тууралуу кенен маалыматты 194 телефону аркылуу алууга болот.
