БИШКЕК, 25-янв. — Sputnik. Кыргызстанда эртеңден баштап Кытай киносунун күндөрү өтө турганын Маданият, маалымат жана туризм министрлиги билдирди.
Иш-чара Тарых жана маданият жылына арналганы айтылууда. 26-январдан 30-январга чейин борбор калаадагы "Манас", "Ала-Тоо", "Кино үйү", "Октябрь" жана "Кыргыз киносу" кинотеатрларында Кытайдын эң мыкты делген беш тасмасы көрсөтүлөт.
Кытай киносунун күндөрү 26-январь күнү салтанаттуу ачылып, ага маданият, маалымат жана туризм министри Алтынбек Максутов, жаштар иши, дене тарбия жана спорт департаментинин башчысы Шейшенкул Бакиров, КТРКнын башкы директору Илим Карыпбеков жана Кытайдын Синьцзян-Уйгур автономдуу районунун маданият департаментинин орун басары Хуан Юнцзюн баштаган делегация катышат.
