БИШКЕК, 22-янв. — Sputnik. Кыргыз-орус өнүктүрүү фонду Ысык-Көл облусундагы чакан жана орто бизнес үчүн 71 миллион сом насыя берген. Бул тууралуу аталган фондунун өкүлдөрүнүн облуска болгон иш сапарында белгилүү болду.
Фондунун өкүлдөрү Ысык-Көл облусунун жетекчилиги менен Каракол жана Балыкчы шаарларында эконом класстагы турак-жай куруу маселесин талкуулап, насыялоого муктаж бир катар ишканаларды көрүштү.
Иш сапар учурунда аталган шаар мэрлери турак-жай түшө турган жер тилкелерин көрсөтүп, ар бир региондун үйгө болгон муктаждыгын айтып беришти. Жеткиликтүү турак-жай куруу боюнча сынамык долбоорлорду ишке ашыруудагы мамлекеттик жана муниципалдык органдардын өз ара иштешүү механизмдери ортого салынды.
Кыргыз-орус өнүктүрүү фонду былтыртан баштап, өкмөттүн мамлекеттик кызматкерлер үчүн жеткиликтүү ипотека берүү программасын колдоо максатында турак-жай курулуш базарын иликтеп келген.
Учурда аталган фонду республиканын бардык дубандардын жетекчилери менен жолугуп, жакын арада курулуш иштерин баштоого белсенип жатат.
