БИШКЕК, 5-янв. — Sputnik. Кара-Көл шаарындагы Кетмен-Төбө айылында 4-январында саат 15:15де Камбар-Ата ГЭСнин аймагында жайгашкан эки кабаттуу 18 батирлүү жыгачтан курулган жатакана толугу менен күйүп кеткен. Бул тууралуу Өзгөчө кырдаалдар министрлиги билдирди.
Маалыматка ылайык, аталган жатакана "Нарын ГЭС" ачык акционердик коомуна тиешелүү болгон. Жатакана 1980-жылы пайдаланууга берилип, ал жерде "Нарын ГЭС" ААКтын төрт жумушчусу жашаган. Өрт болгон учурда жатаканада эч ким болгон эмес. Өрттүн аянты 154 чарчы метрди түзгөн.
Тилсиз жоо саат 18:50дө толук менен жок кылынган. Алдын ала маалыматтар боюнча өрт электр зымдарындагы чыңалуудан чыккан. Учурда келтирилген чыгым эсептелүүдө.
