БИШКЕК, 28-дек. – Sputnik. Шииттердин "Аль-Хашд Аль-Шааби" ыктыярдуу куралдуу күчтөрүнүн командачысы АКШ "Ислам мамлекетинин" башчыларын аскердик операция жүргүзүү учурунда Ирактан чыгарып кетүүдө деп билдирди. Бул туурасында Ирандын Fars агенттиги кабарлайт.
Ыктыярдуу күчтөрдүн лидеринин айтымында, Эр-Рамади жана Эль-Фаллужа шаарларындагы атайын операциялардын кечеңдеши АКШнын кийлигишүүсүнө улам болду.
"Анбар провинциясынын Эр-Рамади жана Эль-Фаллужа шаарларындагы операциялардын кечеңдеши Америка Кошмо Штаттарынын күчтөрүнүн кийлигишүүсүнүн натыйжасынан улам болууда. АКШ тик учактар менен "Ислам мамлекетинин" башчыларын белгисиз жактарга алып чыгып кетүүгө ниеттенип жаткан көрүнөт", — деп айтып берди батальондун командачысы Хайдар аль-Хоссейни аль-Ардави.
Учурда Ирак армиясы аскер аба күчтөрүнүн, элдик кошуундардын жана АКШ башында турган эл аралык коалициянын авиациясынын колдоосу менен Анбарда террорчуларга каршы масштабдуу операцияларды улантып жатат. Алардын башкы уюгу – аталган провинциянын административдик борбору Эр-Рамади шаары болуп турат. Бул аймакты террорчулар ушул жылдын май айында басып алган. Ирактын куралдуу күчтөрү өткөн аптанын шейшемби күнү Эр-Рамадини бошотуу боюнча чабуулдарын баштаган.
