БИШКЕК, 7-дек. — Sputnik. Президент Алмазбек Атамбаев Азербайжандын "Гюнешли" нефть компаниясындагы адам өмүрүнө забын болгон өрт кырсыгына байланыштуу өлкө башчысы Илхам Алиевге көңүл айтты. Бул тууралуу мамлекет жетекчисинин маалымат кызматы билдирди.
Үстүбүздөгү жылдын 5-декабрында Каспий деңизиндеги катуу шамалдан улам газ линиясы үзүлүп, нефть өндүрүүчү платформада өрт чыккан. Акыркы маалымат боюнча кырсыктан бир адам каза болуп, дагы 30 жумушчу дайын-дарексиз болууда. Куткаруу иштеринин натыйжасында 32 жаран аман калган.
Атамбаев "Гюнешли" платформасындагы кырсыкка байланыштуу көңүл айтты.
"Жеке өзүмдүн жана жалпы Кыргызстандын атынан азербайжан элинин аза кайгысыз тең бөлүшүп, каза болгон жарандын жакындарына көңүл айтып, жаракат алгандар тез арада сакайып кетишине тилектешмин", — деп айтылат телеграммада.
Трагедиядан улам президент Илхам Алиев республикада аза күнүн жарыялаган.
