БИШКЕК, 25-ноя. — Sputnik. Кыргыз-орус өнүктүрүү фонду тарабынан чакан жана орто бизнеске 12 пайыздык үстөк менен узак мөөнөткө берилүүчү насыянын көлөмү 388 миллион сомду түзгөнүн аталган фонд билдирди.
Бүгүнкү күндө фонддун программасы боюнча 44 маалымдама келип түшкөн. Анын 35ине 188 миллион сомдук насыя берилген.
Бөлүнгөн насыянын 69,6 пайызы айыл чарба жаатында иш алып барган компанияларга жумшалган. Эки банктын дарегине келген маалымдамалардын саны 222ге жетип, жалпы суммасы 3,3 миллиард сомду түзгөн.
Сентябрь айында Кыргыз-орус өнүктүрүү фонду чакан жана орто бизнести даректүү каржылоо программасын ишке ашыруу максатында "Айыл Банк" жана "РСК Банк" менен келишим түзүп, эки банкка 1,2 миллиард сом бөлүп берген. Аталган программанын алкагында ишкерлерге беш жылдык мөөнөткө 12 пайыздык үстөк менен жеңилдетилген насыя алууга мүмкүнчүлүк берилет.
