БИШКЕК, 3-ноя. — Sputnik. Жаңы өкмөттүн курамындагы мамлекеттик геология агенттиги министрлик болуп, ал эми Эмгек жана миграция министрлиги өз калыбына калтырылышы зарылдыгын Тоо-металлургиялык профсоюзунун борбордук комитетинин төрагасы Элдар Тажибаев билдирди.
Маалыматка ылайык, жаңы түзүлө турган өкмөттүн структурасында Геология агенттиги ошол боюнча калып, Эмгек, Энергетика жана Коргоо министрликтери комитет жана кызмат болушат.
Тажибаевдин айтымында, тоо-кен тармагы учурдагыга караганда көбүрөөк көңүл бурууга муктаж.
"Тоо-кен тармагы ИДПнын 10 пайыздан ашыгын, экспорт жана өнөр жай өндүрүшүнүн тең жарымын камсыздайт. Мындан ары да өнүгүүгө бардык мүмкүнчүлүгү бар. Депутаттар экономика үчүн аталган тармактын маанилүүлүгүн белгилеп, Жогорку Кеңештин структурасында отун-энергетикалык жана кен пайдалануу боюнча өзүнчө комитет түзүүдө", — дейт эксперт.
Тажибаев эгер Геология агенттиги министрлик болуп калса, табигый ресурстарды сактоо, өндүрүү, пайдалануу, изилдөө жана кен казуу тармагын башкаруу жаатындагы мамлекеттик саясатты иштеп чыгып, аны жүзөгө ашырууну тапшыруу керектигин белгилейт.
"Аталган тармактагы ишмердүүлүктү жөнгө салып, укуктук-ченем актыларын иштеп чыгууну, өнөр жай коопсуздугун көзөмөлдөө, экологияны жана айлана-чөйрөнү коргоо, кадрларды окутуу маселелерин да бир эле мамлекеттик органга жүктөлүүсү кажет", — дейт комитет төрагасы.
Тажибаев социалдык-эмгек изилдөө борборунун директору катары эмгек жааты социалдык-экономикалык жана саясий туруктуулукту камсыздап, жарандардын жашоо деңгээлин жогорулатуучу шарт-жагдайларды түзү берерин белгилейт.
"Кыргызстанда 2,3 миллион адам жумуш менен камсыздалган. Анын жарымы көмүскөдөгү уюм-ишканаларда иштейт. Алардын эмгеги регламент менен чектелбейт, демек укуктары да корголгон эмес. Мындан улам салык органдарына жана Социалдык фондго милдеттүү төлөмдөр төлөнбөйт", — дейт ал.
Маалыматка ылайык, өкмөттүн жаңы курамында 12 министрлик, эки мамлекеттик комитет, сегиз агенттик жана 11 кызмат, эки инспекция жана төрт атайы мамлекеттик орган болот.
