БИШКЕК, 13-окт. — Sputnik. Спирт ичимдиктирин ичип отуруп, келген мейманын бычак менен сайып өлтүрүп салган жаран кармалганын ИИМ билдирди.
Маалыматка ылайык, үстүбүздөгү жылдын 11-октябрында кармалган адам Бишкектин Арча-Бешик жаңы конушунда жашаганы белгилүү болду. Кечке маал үйүнө таанышы келип, экөө арак ичишкен. Сөздөн сөз чыгып отуруп, экөө уруша кетет да, 39 жаштагы коногун үй ээси бычак менен көкүрөк тушка сайып салат.
Кошуналар аны шаардык №4 ооруканага жеткиришкен, бирок алган жаратынан улам бычак жеген киши жолдо каза болгон.
Окуя болгон жерге келген милиция кызматкерлери далил катары бычакты табышкан. Кылмышка шектелип 35 жаштагы үй ээси убактылуу кармоочу жайга киргизилди.
Учурда тергөө иштери жүрүп жатат.
