Жолугушуу учурунда премьер-министр үйдүн ремонтуна жана балдардын кийим-кечеси үчүн өз чөнтөгүнөн дагы 100 миң сом бере турганын билдирди.
Сариев Социалдык өнүктүрүү министри Кудайберген Базарбаевге тез арада үй-бүлө үчүн жөлөк пул төлөө боюнча бардык аракеттерди көрүүнү, ал эми жергиликтүү бийлик органдарына Исмаевдин балдары үчүн бала бакча төлөмүн 50 пайызга кыскартуу жагын караштырууну тапшырды.
"Премьер-министрдин айтуусу менен учурда жергиликтүү бюджеттен балдарга 18 жашка чейин ай сайын акча бөлүү тууралуу сунуш даярдалып жатат", — деди маалымат кызматынын жетекчиси.
Кырсык 17-августта Ысык-Көлдүн Григорьевка айылында болгон. Көл жээгинде майып кыздын сууга чөгүп жатканын көрүп 29 жаштагы Бишкек шаарынын тургуну Памир Исмаев жардам берүүгө шашылган. Тилекке каршы, кызды куткарып, бирок өзү чөгүп кеткен. Анын сөөгү сегиз күндөн кийин табылган. Исмаевдин артында төрт баласы жана ай-күнүнө жетип турган келинчеги калган.
Буга чейин Исмаевдин энесин Өзгөчө кырдаалдар министрлиги "Каарман" төш белгиси менен сыйлаганы маалымдалган.
