БИШКЕК, 25-сен. — Sputnik. Чет элдик инвесторлор кыргызстандык бизнес долбоорлоруна көбүрөөк акча сала баштаганын Улуттук статистикалык комитет билдирди.
Маалыматка ылайык, үстүбүздөгү жылдын сегиз айында 53,5 миллиард сом инвестиция түшкөн, бул өткөн жылдын ушул маалына салыштырмалуу 4,7 миллиард сомго көп экени белгилүү болду.
Түшкөн каражаттын үчтөн бири кен казууга жумшалат. 15 пайызы энергосектор, суу чыгаруу жана билим берүү тармактарына бөлүнгөн.
Жалпы каражаттын төрт пайызы унаа ишмердүүлүгүнө, дагы ушунча акча унаа сатууга жана сатып алууга багытталган.
Илим, башкаруу жана финансы жааты чет элдик ишкерлердин көңүлүн көп бурбайт сыяктуу — баарына болгону 28 миллион сом бөлүнгөн. Бул жалпы каражаттын бир пайызына да жетпеген сумма.
