БИШКЕК, 12-сен. — Sputnik. Эль-Кувейт шаарында Кыргызстан менен Кувейттин ортосундагы инвестицияларды өз ара коргоо макулдашуусу боюнча сүйлөшүүлөрдүн экинчи бөлүгү өткөнүн Экономика министрлиги билдирди.
Маалыматка ылайык, сүйлөшүүлөрдүн натыйжасында пикир келишпестиктер жоюлуп, аталган Макулдашууга түзөтүүлөр киргизилди. Мындан тышкары, документти мамлекеттердин ички процедурасынан өткөрүү зарылдыгы белгиленди.
Макулдашууга президент Алмазбек Атамбаевдин Кувейт мамлекетине болгон расмий иш сапарынын алкагында кол коюлат.
"Документтин негизинде түз инвестицияларды тартууда инвесторлордун укугун камсыздоо жана Кыргызстан менен Кувейт мамлекеттеринин аймагындагы ишкердүүлүк менен байланышкан тобокелчиликтердин санын кыскартуу максатында укуктук-ченемдик база түзүү каралган", — деп айтылат билдирүүдө.
Макулдашуу эки мамлекеттин ортосундагы соода-экономикалык мамилелердин кеңейишине жана Кувейттен түз инвестициялардын тартылышына шарт түзмөкчү.
