БИШКЕК, 16-сен. — Sputnik. Чет өлкөдө жашап жана эмгектенип жаткан кыргызстандык жарандар шайлоого катышпай калышы мүмкүн экендигин "Замандаш" ассоциациясы билдирет.
10 күндөн бери ири масштабда өтүп келе жаткан "Өзүңдү тизмеден текшер" акциясы бүгүн, 16-сентябрда аяктай турганын биринчи вице-премьер-министр Тайырбек Сарпашев билдирген.
Ал эми буга чейин Мамлекеттик каттоо кызматы биометрикалык маалымат кабыл алуу 18-сентябрда аяктап, 20-сентябрда шайлоочулардын тизмесин түзүү соңуна чыгарын айтып келген.
"Чет жердеги кыргызстандык жарандар шайлоого катышар-катышпасын ушул убакка чейин так аныкташа элек", — деп айтылат билдирүүдө.
Маалыматта жалпы кыргызстандыктардын шайлоого толук катышуусу үчүн мамлекеттин биометрикалык маалымат кабыл алуу жана тизме түзүү механизмдерин тез арада жөнгө салып, бул тууралуу жарандарга маалымат берүү зарылдыгы айтылат.
