БИШКЕК, 31-авг. — Sputnik. Жалал-Абад шаарында Эгемендик күнүнө карата Ленин атындагы борбордук көчө реконструкциядан кийин биринчи вице-премьер-миниср Тайырбек Сарпашевдин катышуусу менен салтанаттуу кайра ачылганын өкмөттүн маалымат кызматы билдирет.
Жалал-Абад шаарынын мэри Салайдин Авазовдун айтымында, оңдоо иштеринин алкагында көчөнүн 400 метр бөлүгүнүн туурасы 20 метрге чейин кеңейтилген.
"Оңдоо иштери үчүн жергиликтүү бюджеттен 11 миллион сом бөлүнгөн. Мындан тышкары, эмдиги жылдын башында Ленин көчөсүнөн эскалатордук көпүрө курууну пландап жатабыз. Бул Кыргызстандагы биринчи эскалатордук көпүрө болот. Тийиштүү каражат табылды", — деди мэр.
Иш-чаранын алкагында Пушкин атындагы сквердин ачылыш аземи болду. Маалыматка ылайык, аталган эс алуу жайын реконструкциялоо үчүн жергиликтүү бюджеттен 2,5 миллион сом бөлүнгөн.
