БИШКЕК, 20-авг. — Sputnik. Сары-Таш — Карамык унаа жолунан 41 килограммадан ашуун баңгизат менен Тажикстандын жараны кармалганын ИИМ билдирет.
Маалыматка ылайык, үстүбүздөгү жылдын 12-августунда Чоң-Алай РИИБ кызматкерлери тарабынан аталган унаа жолунун 130-132-чакырымында кармалган адам Жерге-Тал районунун тургуну экени аныкталган.
Унаанын ичин текшерүү учурунда арткы орундуктун алдынан кара түстөгү эки сумкадан 41 килограмм 878 грамм анаша табылган.
Алынган баңгизат химиялык экспертизага жөнөтүлүп, кармалган адам убактылуу кармоочу жайга киргизилди.
Учурда кылмыш иши козголуп, тергөө иштери жүрүп жатат.
