Путин кимге кандай белек берген?

БИШКЕК, 22-июль — Sputnik. Бейшембиде Балыкчы шаарынын тургуну, 10 жашар Даша Яицкая Россия президенти Владимир Путинден белек катары алты айлык ньюфаундленд күчүгүн алат.

Путиндин атынан дагы кандай белектер берилгенин Sputnik сайты билип көрдү.

Россия президенти кичине балдардын тилектерин көп орундатат экен. Алсак, Копейскиде туруучу 7 жашар Алинага мамлекет башчысы хаски күчүгүн, ал эми Мурманск облусунан Вероникага шалпаң кулак мышыктын баласын тартуулаган. Тирүү белек катары жеткинчектер Путинден терьер, лабрадор, ал тургай, кулун да алышкан.

Балдар тилектери жөнүндө Россиянын президентине өзүлөрү жазат. Эң бөтөнчө белекти Междуреченскиден бир мектеп окуучусу сураган. Катя Челенкова Владимир Путиндин сүрөтүн берүү өтүнүчү менен кат жазган. Кыздын каалоосу аткарылып, сүрөт менен кошо таттуулар да тартуу кылынган.

Россиянын президенти өзүнүн жогорку даражалуу кесиептештерин да белектери менен таң калтырат. Мисалы, Кытай Эл Республикасынын төрагасы Си Цзиньпинге россиялык лидер Россияда чыккан экинчи муундагы YotaPhone смартфонун тапшырган.

Египеттин президенти Абдель Фаттах ас-Сиси россиялык кесиптешинен белекке Калашниковдун автоматын алган. Буга жооп кылып ал Путинге күмүш картуш — египеттиктер фараондор менен падышалардын аттарын жазып келген тактаны белек кылган.

Путин Рим Папасы Францискке Куткаруучу Христостун храмы түшүрүлгөн сүрөттү жана Православ энциклопедиясынын бир нече томун тартуулаган.

Россия лидеринин белек берүүсүнө бир нече окуяларды байланыштырышат. Мисалы, Путин бир нече жолу кол сааты жок калган. Россиянын президенти өз сааттарын тувалык койчунун баласы жана Тула шаарынын бир устасына да тартуулаган.