БИШКЕК, 22-июль — Sputnik. Мамакеев атындагы Улуттук хирургия борборунун дарыгери Эрнис Алыбаевдин жасаган операциясынан улам 19 жаштагы Жовохир Тургунбаев аттуу жаран каза болгонун Акыйкатчынын маалымат кызматы кабарлайт.
Мекемеге арыз менен Жовохирдин атасы, Баткендеги Исфана шаарынын тургуну Рахманкул Байжанов кайрылган.
Анын айтымында, оорулууга операция анын макулдугусуз жасалып, хирург 30 миң сом талап кылган.
"Өткөн жылдын 5-ноябрында ашказан жарасы диагнозу менен Улуттук хирургия борборуна кайрылганбыз. Дарыгер Эрнис Алыбаев алгач баламдын ден соолугу жакшы экенин билдирген. Беш күн өткөндөн кийин Алыбаев уулума операция жасалышы керектигин айтып, 30 миң сом сурады. Мен да, уулум даы операциядан баш тарттык. Буга карабастан Жовохирге операция жасалып, андан кийин балам комага түшүп калды да, 2015-жылдын 4-июлунда эсине келбей каза болду", — деп айтылат билдирүүдө.
Уулунун өлүмүнө Байжанов дарыгерлерди күнөөлөйт.
Акыйкатчы институтунун кийлигишүүсү менен учурда аталган министрлик тарабынан жумушчу топ түзүлүп, иш иликтөөгө алынган.
Текшерүү жыйынтыгында Тургунбаевди дарылоо учурунда кетирилген кемчиликтер аныкталып, хирургия бөлүмүнүн жетекчиси Эрнис Алыбаев, врач-реаниматолог Букаев, анестезиология бөлүмүнүн жетекчиси Болотов, реанимация жана интенсивдүү терапия жетекчиси Болпонова ээлеген кызматтарынан бошотулду.
Мындан тышкары, каза болгон Тургунбаевдин дарылоосуна кеткен чыгымды толугу менен дарыгер Алыбаев төлөп бермей болду.
